Hindiston va Pokiston oʻrtasidagi ziddiyat avjga chiqdi

Hujum uchun javobgarlikni "The Resistance Front" (TRF) nomli guruh oʻz zimmasiga oldi. Bu guruh Lashkar-e-Taiba terroristik tashkilotining boʻlagi sifatida koʻriladi (AP News, 2025). Hindiston hukumati hujum ortida Pokistondagi terroristik guruhlar turganini daʼvo qilmoqda, Pokiston esa bu ayblovlarni qatʼiyan rad etdi.

Hindistonning javobi

Hindiston hukumati hujumdan soʻng 1960-yilda Pokiston bilan imzolangan suv resurslarini boshqarishga doir shartnomani bekor qildi. Shuningdek, Pokiston elchisi Hindistondan chiqarib yuborildi, Hindiston oʻz diplomatlarini Pokistondan chaqirib oldi. Pokiston bilan bogʻliq yagona yer chegarasi va temir yoʻl qatnovi yopildi. Bundan tashqari, Hindiston Pokiston fuqarolarining barcha vizalarini bekor qildi va 48 soat ichida mamlakatni tark etish talab qilindi.

Pokistonning javobi

Hindistonning Pokistonga qoʻygan bunday shartlaridan keyin Pokiston Bosh vaziri Shahboz Sharif Milliy Xavfsizlik Qoʻmitasini chaqirib, Hindiston ayblovlarini “masʼuliyatsiz va asossiz” deb atadi. Rasmiy Islomobod xalqaro hamjamiyatni vaziyatga aralashishga chaqirdi va Hindistonning agressiv siyosatini qoraladi.

Xalqaro munosabatlar

Hujumdan soʻng BMT, AQSh, Buyuk Britaniya va Yevropa Ittifoqi voqeani qoralab, Hindiston bilan birdamlik siyosatini amalga oshirish zarurligini taʼkidlashdi. BMT Bosh kotibi Antoniu Guterresh bu voqeani insoniyatga qarshi jinoyat deb atadi va vaziyatni tinch yoʻl bilan hal etishga chaqirdi.

2025-yilgi Paxalgam hujumi Hindiston va Pokiston oʻrtasidagi ziddiyatni yana bir bor yirik siyosiy va harbiy muammo darajasiga koʻtardi. Har ikki davlatning keskin javoblari mintaqadagi xavfsizlikni izdan chiqarmoqda. Xalqaro hamjamiyatning oʻrtacha vositachiligi orqali kelishuv ehtimoli hozircha past koʻrinmoqda, ammo urush xavfi hanuz dolzarb.

Maʼlumot uchun, Hindiston va Pokiston oʻrtasidagi ziddiyatlar 1947-yilda Hindiston mustaqillikka erishganidan keyin boshlangan. Ularning asosiy nizosi Jammu va Kashmir hududi ustidagi nazoratdir. Bu mojaro 1947, 1965 va 1971-yillarda toʻliq urushlarga olib kelgan. 1989-yildan boshlab Kashmirda qurolli isyonlar avj oldi. 2019-yilda esa Hindiston hukumati Jammu va Kashmirga berilgan konstitutsiyaviy maxsus maqomni bekor qildi, bu esa hududda keskin noroziliklarga sabab boʻldi.