AQSHning BMTdan qarzi tufayli yangi cheklov e'lon qilindi

BMTning ixtisoslashgan muassasasi - Xalqaro mehnat tashkiloti (XMT) dushanba kuni AQShdan to‘lovlar kechikayotgani sababli rahbar o‘rinbosari lavozimiga tayinlangan yuqori martabali AQSh rasmiysi nomzodini bekor qilganini ma’lum qildi.

“Shu sababli Sheng Li (Amerika Qo‘shma Shtatlari) avval rejalashtirilganidek, iyul oyida Bosh direktor o‘rinbosari lavozimini egallamaydi”, — deyiladi tashkilotning Reuters agentligiga bergan bayonotida.

Sheng Li bir necha oylik kechikishlardan so‘ng aprel oyida XMT tomonidan ushbu lavozimga tayinlangan edi. Biroq tashkilot Qo‘shma Shtatlar badallarini to‘lamagunicha tayinlov amalga oshirilmasligini ma’lum qildi.

Moliyaviy qiyinchiliklarga duch kelayotgan tashkilot xodimlarni ishga yollashni va zaruratsiz xizmat safarlarini allaqachon to‘xtatib qo‘ygan hamda ayrim xodimlarni arzonroq mamlakatlarga ko‘chirish bo‘yicha chora-tadbirlarni ko‘rib chiqmoqda.

Uch diplomatning Reuters agentligiga bildirishicha, Vashingtondan qarzlarining kamida 50 million dollarini to‘lash so‘ralmoqda.

Qo‘shma Shtatlar odatda eng yirik donor sifatida XMT byudjetining 22 foizini to‘lab, bosh homiy o‘rinbosari rolini egallaydi.

Bosh qarorgohi Jenevada joylashgan agentlik veb-saytidagi ma’lumotlarga ko‘ra, 29-may holatiga AQSH 2026-yil uchun jami 257 million Shveytsariya franki (328 million dollar) hamda 2024 va 2025-yillardagi avvalgi qarzdorliklarni to‘lashi kerak.

“Bosh direktor “shu sanagacha to‘lov qilishingiz kerak”, dedi”, – deydi bir diplomat buni ultimatum deya ta’riflab. XMT esa Reuters agentligiga ultimatum qo‘ymaganini ma’lum qildi.

“Biz juda katta noaniqlikka yuz tutyapmiz”, – dedi tashkilot xodimlaridan biri. Agar a’zo davlatlar, jumladan, AQSH sentyabrgacha o‘z qarzlarini to‘lamasa, tashkilot 27 million franklik likvidlik tanqisligiga duch keladi, bu esa XMTning favqulodda choralar ko‘rishiga olib keladi va yanvargacha 120 ta lavozim qisqartirilishi mumkin, deya qo‘shimcha qildi u.

Li yangi lavozimiga Oq uyning sobiq yuqori martabali iqtisodiy amaldori Nels Nordkvist nomzodini qaytarib olgach, aprel oyida tayinlangan edi.