Trampning “Ozodlik loyihasi” – bu boshi berk ko‘cha loyihasidir - Abbos Aroqchi

Eron tashqi ishlar vaziri Abbos Aroqchi AQShning “Ozodlik loyihasi” deb atalgan rejasi doirasida Hormuz bo‘g‘oziga aralashish niyatini qoralab, bu tashabbus keskinlikni yanada kuchaytirishi va Vashingtonni navbatdagi mintaqaviy boshi berk ko‘chaga olib kirishi haqida ogohlantirdi.

“Hormuzdagi voqealar siyosiy inqirozning harbiy yechimi yo‘qligini yaqqol ko‘rsatib turibdi”, - dedi Aroqchi X platformasida.

Uning so‘zlariga ko‘ra, Pokistonning xayrixoh sa’y-harakatlari tufayli muzokaralar oldinga siljiyotgan bir paytda, Qo‘shma Shtatlar yomon niyatli kimsalar tomonidan yana botqoqqa tortilishdan ehtiyot bo‘lishi kerak. Bu BAAga ham tegishli.

Dushanba kuni Eron Xotam al-Anbiyo markaziy shtabi qo‘mondoni general-mayor Ali Abdullohiy har qanday xorijiy harbiy kuch, xususan, AQSH kuchlari Hormuz bo‘g‘oziga yaqinlashishga yoki unga kirishga urinsa, hujumga uchrashidan ogohlantirdi.

“Biz Hormuz bo‘g‘ozi xavfsizligini bor imkoniyatlarimiz bilan ta’minlaymiz va qat’iy nazorat qilamiz. Barcha tijorat kemalari va neft tankerlarini xavfsizliklari tahdid ostida qolmasligi uchun ushbu hududda joylashgan (Eron) Qurolli Kuchlari bilan kelishmagan holda Hormuz bo‘g‘ozidan o‘tishga urinishdan tiyilishga chaqiramiz”, – deb bayonot berdi yuqori martabali general.

Avvalroq Tramp Vashington Hormuz bo‘g‘ozida qolib ketgan xorijiy kemalarga yordam berish uchun dengiz operatsiyasini boshlashini e’lon qildi. Bu qadam mintaqada davom etayotgan keskinlik fonida gumanitar tashabbus sifatida taqdim etilgan.

Tramp jabr ko‘rgan kemalarning aksariyati hozirgi urushda ishtirok etmayotgan mamlakatlarga tegishli ekanini ta’kidlab, ularni inqirozga yuz tutgan “betaraf va begunoh kuzatuvchilar” deya ta’rifladi.