Rossiya 9-mayga “jiddiy bo‘lmagan” sulh e’lon qildi

Dushanba kuni Rossiya 8-9 may sanalarida Ukraina bilan bir tomonlama sulh e’lon qildi.

Bunga javoban Ukraina 5-6 may kunlari o‘z sulhini e’lon qilib, Rossiyaning harbiy bayrami vaqtida o‘t ochishni to‘xtatishni kutish “jiddiy emas”ligini ta’kidladi.

Ikki tomon o‘rtasidagi bu kelishmovchilik Vashington e’tiborini Yaqin Sharqdagi mojaroga qaratayotgani sababli AQSH boshchiligidagi urushni tugatishga qaratilgan diplomatik sa’y-harakatlar susaygan bir paytga to‘g‘ri kelmoqda.

“Rossiya Qurolli kuchlari Oliy Bosh qo‘mondoni Vladimir Putinning qaroriga muvofiq, 2026-yilning 8–9-may kunlari o‘t ochishni to‘xtatish rejimi e’lon qilindi… Umid qilamizki, Ukraina tomoni ham bunga amal qiladi”, — deyiladi Rossiya Mudofaa vazirligining MAX platformasida e’lon qilgan xabarida.

“Agar Kiyev rejimi Ulug‘ Vatan urushidagi G‘alabaning 81 yilligi nishonlanishini barbod qilishga qaratilgan o‘zining jinoiy rejalarini amalga oshirishga urinsa, Rossiya Qurolli Kuchlari Kiyev markaziga javoban ommaviy raketa zarbasini beradi”, – deya qo‘shimcha qilingan xabarda. – “Biz Kiyevning tinch aholisi hamda xorijiy diplomatik vakolatxonalar xodimlarini shaharni zudlik bilan tark etish zarurligi haqida ogohlantiramiz”.

Ukraina Prezidenti Volodimir Zelenskiy dushanba kuni bayramni nishonlashi uchun Moskvaning sulh taklif qilishi "jiddiy emas"ligini hamda Rossiya Ukraina dronlari “Qizil maydon ustida g‘uvullab uchishi”dan qo‘rqayotganini aytdi.

“Bugungi kunga qadar Rossiya ijtimoiy tarmoqlarida da’vo qilinayotgan harbiy harakatlarni to‘xtatish tartibi bo‘yicha Ukrainaga hech qanday rasmiy murojaat bo‘lmadi”, – dedi Zelenskiy X’dagi postida.

“Shu munosabat bilan biz 5-maydan 6-mayga o‘tar kechasi soat 00:00 dan o‘t ochishni to‘xtatish rejimini e’lon qilamiz. Bu vaqtga qadar qolgan muddatda sulhning kuchga kirishini ta’minlash mumkin”, – deya qo‘shimcha qildi u.

Keyinroq Ukraina rahbari “xavfsizlik sohasidagi hamkorlik” bo‘yicha muzokaralar o‘tkazish uchun Ko‘rfaz davlati Bahraynga kelib qo‘ngan.

Ukraina rasmiylarining xabar berishicha, dushanba kuni Rossiyaning Ukraina bo‘ylab bergan zarbalari oqibatida kamida to‘qqiz kishi halok bo‘lgan.

Dushanba kuni Rossiyaning Ukrainaning ikkinchi yirik shahri bo‘lmish Xarkov yaqinidagi Merefa shahriga ballistik raketa bilan hujum qilishi natijasida yetti nafar tinch aholi vakili halok bo‘ldi va o‘nlab odamlar yaralandi, deb ma’lum qildi viloyat hokimiyati.

AFP nashri jurnalistlari Merefa ko‘chalarida adyol va oq choyshablar bilan yopilgan, sochilib yotgan bir nechta jasadni ko‘rganlar; hujumdan do‘konlar, uylar va mashinalar ham zarar ko‘rgan.