Jizzaxda yuk mashinasiga urilgan Lacetti yonib ketdi. 5 kishi halok boʻldi

Dastlabki maʼlumotlarga koʻra, Qashqadaryo viloyati Chiroqchi tumanida yashovchi, 2003 yilda tugʻilgan haydovchi boshqargan Isuzu yuk mashinasi gaz quyish shoxobchasidan chiqish paytida yoʻldagi “Yoʻl bering” (2.4) va “Harakatlanish oʻngga” (4.1.2) belgilarining talablariga rioya qilmay qatnov qismiga chiqqan.

Shu vaqtda Samarqand yoʻnalishi boʻylab harakatlanib kelayotgan, Surxondaryo viloyati Oltinsoy tumanida yashagan 2002 yilda tugʻilgan haydovchi boshqargan Lacetti avtomobili yuk mashinasiga urilib ketgan.

Zarba taʼsirida Lacetti butunlay yonib ketgan. Hodisa oqibatida ushbu avtomobil haydovchisi va salonidagi 4 nafar yoʻlovchi voqea joyida halok boʻlgan.

Mazkur holat yuzasidan Jizzax viloyati IIB huzuridagi Tergov boshqarmasi tomonidan JK 266-moddasi 3-qismi “a” bandi bilan jinoyat ishi qoʻzgʻatilgan. Tergov harakatlari davom etmoqda.

Bundan avval Andijonda oraliq masofaga rioya qilinmagani sabab 4 ta avtomobil ishtirokida YTH sodir boʻlgani xabar qilingan edi.