Oʻzbekistonda nikohlar kamaymoqda, ajrimlar esa koʻpaymoqda

Milliy statistika qoʻmitasi maʼlumotiga koʻra, 2025 yilning 9 oyida mamlakatda 177 ming nikoh qayd etildi. Bu koʻrsatkich soʻnggi besh yilda izchil kamayib bormoqda. 2021 yilda 206,8 ming nikoh qayd etilgan boʻlsa, bu yilgi raqam bundan qariyb 30 mingga kam.

Shu bilan birga, hisobot davrida 35,4 ming nikoh bekor qilingan. Yil boshidan buyon esa qariyb 32 ming oila ajralib ketgani haqida prezident Shavkat Mirziyoyev rahbarligidagi yigʻilishda maʼlum qilingan.

16 ming ota-ona aliment toʻlashdan boʻyin tovlamoqda, baʼzilari esa oilasi va bolalarini kredit qarzlari bilan tashlab ketmoqda. Davlat rahbari ayrim ota-onalar farzandlariga javobgarlikni his etmayotganini tanqid qildi. Shu bilan birga, oilalarni mustahkamlash uchun nikoh shartnomasi tuzish afzalliklarini targʻib etish zarurligini alohida qayd etdi.