Samarqandda mukofot jamgʻarmasi 855 ming AQSh dollari boʻlgan shaxmat turniri boshlandi

Unda jahon shaxmat reytingida yuqori oʻrinlarni egallab kelayotgan kuchli grossmeysterlar, shuningdek, FIDE prezidenti tavsiyasi bilan taklif etilgan shaxmatchilar va xalqaro musobaqalar gʻoliblari qatnashadi.

Umumiy mukofot jamgʻarmasi 855 ming AQSh dollari boʻlgan turnirda 39 mamlakatdan 172 nafar ishtirokchi jahon chempionati yoʻllanmasi uchun dona suradi.

Dunyo reytingining «TOP-100»ligiga kirgan kuchli shaxmatchilar orasidan toʻrt nafar shaxmatchi (2 erkak va 2 ayol shaxmatchi) jahon shaxmat toji uchun “Talabgorlar turniri”ga saralab olinadi.

Xalqaro shaxmat federatsiyasi (FIDE), Sport vazirligi, Yoshlar ishlari agentligi hamda Oʻzbekiston shaxmat federatsiyasi hamkorligida tashkil etilayotgan nufuzli turnir oldidan musobaqa tashkiliy qoʻmitasi aʼzolari va shaxmat yulduzlari ishtirokida matbuot anjumani boʻlib oʻtdi.

Unda Sport vaziri Adham Ikromov, Xalqaro shaxmat federatsiyasi prezidenti (FIDE) Arkadiy Dvorkovich, Yoshlar ishlari agentligi direktori, Oʻzbekiston shaxmat federatsiyasi raisi birinchi oʻrinbosari Alisher Saʼdullayev hamda amaldagi jahon chempioni, hindistonlik Dommaraju Gukesh va yoshlar oʻrtasida ikki karra jahon chempioni, ayollar xalqaro sport ustasi Afruza Hamdamova ishtirok etib, musobaqa va 2026 yilda Samarqandda oʻtkaziladigan 46-Butunjahon shaxmat olimpiadasiga tayyorgarlik haqida fikrlarini bildirdi.

Kecha musobaqaning ochilish va qurʼa tashlash marosimi boʻlib oʻtdi. Bugundan bellashuvlarga start berildi.