Tojikiston bilan tovar ayirboshlash hajmi 757 million dollarga yetdi

Dushanbe shahrida bugun boʻlib oʻtgan Oʻzbekiston Respublikasi va Tojikiston Respublikasi oʻrtasida savdo-iqtisodiy hamkorlik boʻyicha Hukumatlararo komissiyaning navbatdagi yigʻilishida bu haqida maʼlumot berildi deb xabar qilmoqda UzA.uz.

Tadbirda kelgusida oʻzaro savdoni 1 milliard dollarga yetkazish uchun birgalikda barcha choralarni koʻrish lozimligi, bunga sanoat kooperatsiyasi, energetika, qishloq va suv xoʻjaligi, transport-logistika sohalarida qator qoʻshma loyihalarni izchil amalga oshirish orqali erishish mumkinligi qayd etildi.

Xabarga qaraganda, Oʻzbekiston-Tojikiston xalqaro chegara savdo zonasini yaratish loyihasini amalga oshirish jadallashtiriladi. Qishloq xoʻjaligi mahsulotlarini uchinchi mamlakatlarga eksport qilish uchun chegara hududlarida ulgurji tarqatish markazlari yaratiladi.

Maʼlumot uchun, Oʻzbekistonning MDH davlatlari bilan tashqi savdo aylanmasi 20,6 milliard dollarga yetgan.