Tojikiston chegarachilari va «Tolibon» oʻrtasida qurolli toʻqnashuv yuz berdi

25 oktabr kuni Tojikiston va Afgʻoniston chegarasida qurolli toʻqnashuv sodir boʻldi. «Asia-Plus» nashri xabariga koʻra, hodisa Tojikistonning Shamsiddin Shohin tumani va Afgʻonistonning Badaxshon viloyati Shahri Buzurg tumani oʻrtasida joylashgan Dovang qishlogʻida roʻy bergan.

Dastlabki maʼlumotlarga koʻra, mojaro Panj (Amudaryo) daryosi oʻzanining oʻzgarishi bilan bogʻliq tortishuvlardan kelib chiqqan. Bu masala avval ham ikki davlat oʻrtasida nizolarga sabab boʻlgan.

OAV xabar berishicha, otishma xorijiy, jumladan Xitoy kompaniyalari ish olib boradigan oltin qazib olish hududida sodir boʻlgan. Manbalar taʼkidlashicha, toʻqnashuv qurbonlarga olib kelgan, ammo halok boʻlganlar va jarohatlanganlarning aniq soni hozircha maʼlum emas. Har ikki tomondan yoʻqotishlar boʻlgani yoki yoʻqligiga oydinlik kiritilmagan.

Tojikiston rasmiylari ham, «Tolibon» harakati vakillari ham hozircha voqeaga rasmiy izoh bermagan.

Maʼlumot uchun, Tojikiston «Tolibon» bilan toʻgʻridan-toʻgʻri aloqalar yoʻqligini eʼlon qilgan Markaziy Osiyodagi yagona davlat hisoblanadi. Dushanbe Kobul hukumatini inklyuziv hukumat tuzishga va inson huquqlariga rioya qilishga chaqiradi.

Siyosiy pozitsiyaga qaramay, ikki davlat oʻrtasida savdo-iqtisodiy aloqalar va gumanitar hamkorlik davom etmoqda. 

 Shuningdek, Tojikistonning Afgʻonistondagi elchixonasi va konsulligi ham faoliyat yuritmoqda.