AQSh Gʻazoni egallaydi — Tramp

Trampning soʻzlariga koʻra, AQSh Gʻazo sektori ustidan nazorat qilib, u yerda portlamay qolgan bomba va boshqa qurollardan demontaj qiladi. 

"Agar kerak boʻlsa, biz uning ustidan nazorat qilamiz, uni rivojlantiramiz, minglab ish oʻrinlarini yaratamiz. Bu butun Yaqin Sharq faxrlanadigan narsa boʻladi. U yer Yaqin Sharq "riviera"sining uyi boʻladi. Men buni koʻp oylar davomida juda diqqat bilan oʻrganib chiqdim", deya aytgan Tramp.

Isroil Bosh vaziri Netanyaxu esa bu soʻzlarni ijobiy qabul qilgan. Uning soʻzlariga koʻra, Tramp "qutidan tashqarida, yangi gʻoyalar bilan oʻylaydi" va doim "anʼanaviy fikrlashni buzishga tayyorligini namoyish etadi". 

Trampning bu taklifi allaqachon AQSh siyosatchilarining tanqidiga sabab boʻldi. Demokrat senator Kris Myorfi Prezident Tramp "aqldan ozganini" aytib chiqdi.

"U butunlay aqldan ozgan. AQShning Gʻazoga bostirib kirishi minglab amerikalik askarlarning oʻlimiga va oʻnlab yillar davomida Yaqin Sharqdagi urushga olib keladi. Bu hazilga oʻxshaydi", deb yozgan parlament aʼzosi X'dagi oʻzining sahifasida.

Tramp tarafdori — Janubiy Karolina shtatidan respublikachi senator Lindsi Grem ham bu yangilikka shubha bilan qaramoqda.

"Keling, arab doʻstlarimiz bu haqda nima deyishlarini koʻrib chiqaylik. Oʻylaymanki, janubiy karolinaliklarning aksariyati amerikaliklarni Gʻazoni qoʻlga olish uchun yuborishdan xursand emas. Menimcha, bu muammoli boʻlishi mumkin", deya fikr bildirgan u.