Ukraina va Saudiya: Kiyev harbiy tajribasini Fors ko‘rfaziga eksport qilmoqda

26-mart kuni qirollikka yetib kelgan prezident Volodimir Zelenskiy X ijtimoiy tarmog‘ida Saudiya valiahd shahzodasi Muhammad bin Salmon bilan uchrashuv oldidan “muhim kelishuv”ga erishilganini ma’lum qildi.

“Bu kelajakdagi shartnomalar, texnologik hamkorlik va sarmoyalar uchun zamin yaratadi… Qolaversa, Saudiya Arabistonida Ukraina uchun ahamiyatli bo‘lgan imkoniyatlar mavjud. Ushbu hamkorlik o‘zaro manfaatli bo‘ladi”, – deb yozdi Zelenskiy.

Saudiya Arabistoni ham ikki davlat mudofaa xaridlari bo‘yicha memorandum imzolaganini e’lon qildi.

Ar-Riyod 28-fevral kuni – AQSH va Isroil Tehronga birinchi marta zarba berganidan beri Erondan uchirilgan yuzlab dronlar va o‘nlab raketalarni tutib olgan.

Tehron mintaqadagi AQSH obyektlarini nishonga olayotganini ta’kidlasa-da, tinch aholining xatar ostida qolishi munosabatlarni yomonlashtirdi. Hujumlar natijasida hozirga qadar Fors ko‘rfazi mamlakatlarida 25 kishi halok bo‘lgan.

Ukrainlarning salohiyati

Ukraina 2024-yilning oxiridan beri kuchaygan Moskvaning dron hujumlariga qarshi arzon, ammo samarali tutib oluvchi dronlarning asosiy ishlab chiqaruvchisiga aylandi.

Birgina shu qishning o‘zida Rossiya Ukrainaga 19 mingdan ortiq dron uchirgan. Seshanba kuni Moskva to‘rt yillik urush davridagi eng yirik havo hujumlaridan birini amalga oshirdi: 24 soat ichida 948 ta dron uchirdi, oqibatda ikki kishi halok bo‘lgan.

Kiyevdagi “Al-Jazira” muxbiri Odri Makalpinning fikricha, Ukrainaning dron hujumlariga qarshi turish tajribasi tobora oshib bormoqda. Bu sohada, ehtimol, jahon yetakchilaridan biriga aylanib ulgurdi.

18-mart kuni Zelenskiy Eron hujumlaridan himoyalanishda yordam berish uchun Yaqin Sharqqa 201 nafar dronlarga qarshi kurashish bo‘yicha mutaxassis yuborilganini aytgandi.

Ukraina Havo mudofaasi qo‘shinlari qo‘mondoni o‘rinbosari Yuriy Cherevashenkoning aytishicha, dronlar Yaqin Sharqdagi qum bo‘ronlarida o‘ziga xos qiyinchiliklarga duch keladi. Ammo muvaffaqiyatli tutib olish uchuvchining mahoratiga bog‘liq.

Ukraina bejiz yordamga oshiqmayapti

Bloomberg nashrining bildirishicha, Ukrainaning Rossiya agressiyasiga qarshi himoyalanishga mo‘ljallangan mablag‘lari taxminan ikki oyga yetadi. Moskva esa AQSH va Isroilning Eronga qarshi urushi tufayli katta foyda ko‘rmoqda.

Joriy yilda Ukrainaga jami 52 milliard dollar tashqi yordam zarur, xususan, Qo‘shma Shtatlardan qurol sotib olishga 15 milliard dollar kerak.

Hukumat ushbu moddiy va texnologik ehtiyojni bartaraf etish uchun strategik chora qidirmoqda.