Туркманистонда иш ҳақи ва нафақаларни оширмаслик таклиф қилинди

У Халқ Маслаҳати мажлисида, халқ ҳокимиятининг олий органи раҳбари Гурбангули Бердимуҳамедов иштирокидаги тадбирда чиқиш қилган.

Отамуродовнинг сўзларига кўра, ҳукумат саъй-ҳаракатлари туфайли кўп йиллардан бери иш ҳақи, пенсия, давлат тўловлари ва талаба стипендиялари мунтазам равишда ошириб келинмоқда. У халқнинг “тинч, фаровон ва бахтли ҳаёт кечираётгани”, аҳолининг ижтимоий-маиший шароити эса юқори даражага етганини таъкидлаган.

Оқсоқол бундай имтиёзлар дунёда бошқа ҳеч бир мамлакатда мавжуд эмаслигини, бугун эса ҳар бир оила зарур бўлган нарсани олишга имконияти етишини айтиб, шунинг учун маош ва тўловларни оширишни тўхтатиш лозимлигини билдирган. У Бердимуҳамедовдан ушбу ташаббусни қўллаб-қувватлашни сўраган.

Отамуродовнинг фикрича, оширишдан тежаб қолинган маблағларни “мамлакатни янада ривожлантириш” ҳамда “бошқа муҳим йўналишларга” йўналтириш мумкин.

“Туркманистонда ўн йилдан ортиқ вақт давомида давлат раҳбарининг фармонлари асосида ҳар йили иш ҳақи, пенсия, давлат тўловлари ва стипендиялар ўртача 10 фоизга ошириб келинмоқда. Ҳозирда энг кам иш ҳақи 1410 манатни (тахминан 400 доллар), пенсия эса 550 манатни (тахминан 155 доллар) ташкил этади”, – дейилади хабарда.

Turkmen news хабарига кўра, оқсоқолнинг бу таклифи туркман ижтимоий тармоқларида қизғин муҳокамаларга сабаб бўлган. Ҳатто Turkmenportal нашри бу хабар остидаги изоҳларни ёпиб қўйишга мажбур бўлган.

Фойдаланувчилар инфляция одатда индексация қилинадиган 10 фоиздан анча юқори эканини таъкидлаган: масалан, гўшт нархи ярим йил ичида икки баравар ошиб, 100 манатга (5 доллар) етган. Талабалар формаси эса оилаларга тахминан 12 минг манатга (600 доллар) тушмоқда ва ота-оналар фарзандларининг ўқишини тўлаш учун кредит олишга мажбур бўлмоқда.