Гулистон шаҳрига янги автобуслар олиб келинди

Президент Гулистон шаҳри жамоат транспорти инфратузилмасини такомиллаштириш мақсадида олиб келинган замонавий автобуслар тақдимоти билан танишди.

Ҳар бири 65 нафар йўловчисни қулай шароитларда манзилига етказишга мўлжалланган ушбу автобуслар паст полли бўлиб, ногиронлиги бўлган шахслар учун махсус пандус ускуналари ва алоҳида ўриндиқлар билан жиҳозланган. Йўл ҳақи тўловларини электрон тарзда амалга ошириш учун “ATTO” тизими ўрнатилган.

Аҳолининг жамоат транспортига бўлган эҳтиёжи ҳисобга олиниб, автобуслар ҳаракати Гулистон шаҳрининг 23 та маҳалласига хизмат кўрсатувчи 7 та шаҳар ички йўналишида брутто-шартнома асосида йўлга қўйилади.

Натижада автобуслар ҳаракат интервали аввалгисига нисбатан 2 баробарга қисқаради, кунига 29 минг нафар аҳолига қулай, хавфсиз ва арзон транспорт хизматлари кўрсатилиши таъминланади.

Яна бир муҳим жиҳат: мазкур қатновлар орқали йилига 38 миллиард сўмдан зиёд транспорт хизматлари кўрсатилади, 120 та иш ўрни яратилади.

Давлат раҳбари мутасаддиларга мамлакатдаги барча шаҳарларнинг жамоат транспорти паркларини шундай замонавий автобуслар билан тўлдириш ишларини изчил давом эттириш, фуқароларга сифатли хизмат кўрсатиш бўйича кўрсатмалар берди.

Шу ерда келгусида 11 метрли, узоқ масофага мўлжалланган яна 30 та автобусни олиб келиш режаси ҳақида ҳам маълумот берилди. Лойиҳа амалга оширилса, қўшимча 150 дан ортиқ иш ўрни яратилади.