Исроилда полиция ушлаган ўзбекистонлик бўйича расмий баёнот берилди

Мазкур ҳолат юзасидан Ўзбекистоннинг Исроилдаги элчихонаси расмий изоҳ берди.

Маълум қилинишича, 2026 йил 28 февраль куни Ўзбекистон фуқароси Н.Х. ракета ҳужуми ва сиреналар янграган вақтда TikTok тармоғига видео жойлаштирган. Видеода айтилган ножоиз сўзлар кейинчалик Исроил ижтимоий тармоқларида ҳам кенг тарқалиб, маҳаллий жамоатчилик орасида норозиликка сабаб бўлган.

Шундан сўнг Исроил фуқароси А.Х. ушбу ҳолат юзасидан полицияга мурожаат қилган.

Элчихона маълумотига кўра, вазиятдан хабардор бўлиши биланоқ консуллик бўлими ходимлари Ўзбекистон фуқароси Н.Х. билан боғланиб, у билан тегишли суҳбат ўтказган. Шунингдек, мурожаат қилган Исроил фуқароси А.Х. билан ҳам тушунтириш ишлари олиб борилган.

Элчихона Исроилда бўлиб турган Ўзбекистон фуқароларини маҳаллий қонунларга қатъий риоя қилиш, хатти-ҳаракатларда эҳтиёткор бўлиш, провокацияларга берилмаслик ҳамда ракета ҳужумлари вақтида Исроил Фронт орти қўмондонлиги томонидан берилган хавфсизлик тавсияларини тўлиқ бажаришга чақирмоқда.

«Айни пайтда Ўзбекистон фуқароси Н.Х. хавфсиз шароитда бўлиб, мазкур масала элчихонанинг консуллик бўлими назоратида турибди», дейилади элчихона баёнотида.

Бироқ ўзбекистонлик муҳожирнинг айнан қаерда ва қандай «хавфсиз шароитда» эканига аниқлик киритилмаган.