Марказий Осиёнинг тўрт давлатида электр узилиши: нима бўлди?

Қозоғистонда 500 кВ кучланишли линиялар узилди

Энг жиддий авария Қозоғистонда қайд этилди. KEGOCга тегишли учта 500 кВ кучланишли электр узатиш линияси – Л-5400, Л-5300 ва Л-5320 фавқулодда тарзда ўчган.

Шундан сўнг аварияга қарши автоматик ҳимоя тизими ишга тушиб, Алмати вилоятининг айрим ҳудудларида электр таъминоти узилган. Қозоғистон Энергетика вазирлиги бу ҳолатни Марказий Осиё энергетика тизимидаги электр оқимининг кескин ўзгариши билан боғлаган.

Алмати шаҳрида электр узилиши натижасида светофорлар ишламаган, тирбандликлар юзага келган, метро фаолиятида ҳам узилишлар кузатилган. Айрим жойларда алоқа ва сув таъминотида ҳам муаммолар қайд этилган.

Қозоғистон ҳукумати электр таъминотини босқичма-босқич тиклаш ишлари олиб борилганини маълум қилди.

Қирғизистон энергетика тизими вақтинча изоляция режимига ўтди

Қирғизистонда ҳам Бишкек ва бошқа ҳудудларда электр таъминоти билан боғлиқ узилишлар ҳақида хабарлар тарқалди.

Қирғизистон Энергетика вазирлиги маълумотига кўра, Қозоғистондаги юқори кучланишли линиялардаги ташқи узилишдан сўнг мамлакат энергетика тизими вақтинча изоляцияланган режимда ишлаган.

Автоматика тизими энергетик ускуналарни ҳимоя қилиш мақсадида ишга тушган. Вазирлик электр таъминоти истеъмолчилар учун узлуксиз сақланганини билдирган.

Тожикистонда сабаб ҳали аниқ эмас

Тожикистоннинг Душанбе, Хўжанд, Кўлоб, Ваҳдат, Нурек, Ҳисор ва бошқа ҳудудларида ҳам электр узилишлари қайд этилди.

Тожикистон Энергетика ва сув ресурслари вазирлиги ҳодисанинг аниқ сабаби ҳали белгиланмаганини маълум қилди.

Шу билан бирга, вазирлик узилишларга Нурек ГЭСида авария сабаб бўлгани ҳақида тарқалган хабарларни рад этди.

Ўзбекистонда Сурхондарё ва бошқа ҳудудлар таъсирланди

Ўзбекистонда электр таъминотидаги узилишлар, хусусан, Сурхондарё вилояти ва айрим бошқа ҳудудларда кузатилди.

Энергетика вазирлигига кўра, қўшни давлат энергетика тизимида содир бўлган авария Марказий Осиёнинг ягона энергетика тизимига таъсир қилган ва бу Ўзбекистоннинг айрим ҳудудларида электр таъминотида узилишларга олиб келган. Электр таъминоти босқичма-босқич тикланган.

Бироқ Ўзбекистон Энергетика вазирлиги қайси қўшни давлатдаги авария назарда тутилганини аниқ айтмаган. Шу сабабли ҳозирча узилишларни тўғридан-тўғри муайян бир давлатдаги авария билан боғлашга шошилмаслик керак.

Кейинчалик Қозоғистон Энергетика вазирлиги Ўзбекистондаги узилишлар Қозоғистон энергетика тизимидаги авария оқибати экани ҳақида тарқалган айрим хабарларни рад этди.

Нега бир нечта давлатда бир вақтда электр ўчди?

Марказий Осиё давлатларининг энергетика тизимлари ўзаро боғланган. Шу сабабли бир ҳудуддаги йирик авария ёки электр оқимининг кескин ўзгариши бутун минтақавий тизимга таъсир қилиши мумкин.