9-qavatdan sakrab oʻz joniga qasd qilmoqchi boʻlgan qizning hayotini saqlab qolindi

Toshkentning Yakkasaroy tumanida koʻp qavatli uy tomidan oʻzini tashlamoqchi boʻlgan oʻsmir qiz qutqarib qolindi. Bu haqda Toshkent shahar IIBB matbuot xizmati xabar bermoqda.

Qayd etilishicha, voyaga yetmagan shaxs koʻp qavatli uylardan birining tom qismiga chiqib, pastga oʻzini tashlamoqchi boʻlgan. Bu holatga guvoh boʻlgan fuqarolardan biri mahalla hududidagi «Tashvish tugmasi»ni bosib, Ichki ishlar organlari Qutqaruv xizmati navbatchilik qismini xabardor qilgan. Mahalla profilaktika inspektoriga ham voqeadan xabar topgan.

Zudlik bilan voqea joyiga yetib borgan mahalla profilaktika inspektori tomga chiqqan. Bu vaqtda pastda jamoat tartibini saqlash bilan shugʻullanayotgan ichki ishlar xodimlari ham vaziyatni nazorat qilgan.

«Voqea joyiga yetib borganimizda, yoshi taxminan 15 larda boʻlgan voyaga yetmagan qiz oʻz joniga qasd qilish maqsadida binoning 9-qavatiga chiqqan edi», — deydi «Damariq» MFY profilaktika inspektori Sanjar Bekmurodov.

U 9-qavatdagi boshqa xonadonlardan birining balkoni orqali, oʻz joniga qasd qilish niyatidagi qizga yaqinlashgan. Qiz nihoyatda agressiv va stress holatida boʻlgani sababli, profilaktik suhbatlar olib borilgan. Uning yonigacha borib olish jarayoni 25−30 daqiqa davom etgan.

«Voyaga yetmagan singlimizni 10−15 daqiqa davomida bor kuchim bilan ushlab turgan vaqtimda, u menga jiddiy qarshilik koʻrsatdi. Ammo oʻzimni qoʻlga olgan holatda uni ushlab turishga muvaffaq boʻldim», — dedi profilaktika inspektori.

Qiz FVV xodimlari koʻmagida arqon orqali tomdagi xavfsiz joyga chiqarib olingan. Shundan soʻng, fuqaro va voyaga yetmagan qiz tibbiy koʻrikdan oʻtkazilgan, mutaxassislar tomonidan psixologik suhbatlar olib borilgan.