Oʻzbekistonda saratonga chalinganlar soni ortib bormoqda

Oʻzbekistonda 100 mingga yaqin saraton kasalligiga chalingan bemorlar borligi maʼlum qilindi.

GLOBOCAN maʼlumotlariga koʻra, 2022 yilda mamlakatda 35 900 ta yangi saraton holati aniqlangan. Ularning 55 foizi, yaʼni 19 865 tasi ayollar hissasiga toʻgʻri keladi. Ayollar orasida eng koʻp uchraydigan kasalliklar — koʻkrak saratoni (5022 holat) va bachadon boʻyni saratoni (2654 holat) boʻlgan.

Maʼlumot uchun, 2019 yilda bachadon boʻyni saratoni 1660 nafar ayolda qayd etilgan. Bu kasallik dunyo miqyosida ayollardagi saratonlar orasida 4-oʻrinda turadi, koʻkrak saratoni esa 1-oʻrinni egallaydi.

Mutaxassislar saraton kasalliklari soʻnggi yillarda yoshlar orasida ham koʻpayib borayotgani va koʻp hollarda kech aniqlanayotganidan ogohlantirmoqda.