Oʻzbekistonga olib kelingan ukrainalik bolalarga 2 mingta oʻquv qurollari toʻplami sovgʻa qilindi

5 iyundan 17 iyunga qadar Oʻzbekiston hukumati tomonidan ukrainalik bolalar uchun tashkil etilgan taʼtil Ukraina elchixonasi tomonidan "gʻamxoʻrlikka aylangan haqiqiy uy" sifatida baholandi. Bunday yaxshilik uchun elchixona Oʻzbekiston Respublikasi Tashqi ishlar vazirligi, Kasaba uyushmalar Federatsiyasiga va Maktabgacha va maktab taʼlim vazirligiga oʻz minnatdorchiligini bildirdi.

"Shuningdek, saxovatli gumanitar yuk – boʻlajak maktab oʻquvchilarimiz uchun ajoyib sovgʻa boʻladigan 2000 ta "birinchi sinf oʻquvchisi toʻplami" uchun alohida tashakkur. Bunday yordam Ukraina uchun bebaho boʻlib, qoʻllab-quvvatlashga muhtoj bolalarga umid va tabassumlar hadʼya etadi. Biz sizning insonparvarligingiz va ochiqligingizni chuqur qadrlaymiz! Birgalikda biz mustahkam kelajak quramiz!", — deyiladi Ukrainaning Oʻzbekistondagi elchixonasi xabarida.

Eslatib oʻtamiz, 2024 yilning 11 noyabr kuni Isroil-Falastin urushida jabr koʻrgan 100 nafardan ortiq falastinlik bolalar va ayollar Oʻzbekistonga olib kelingan edi.