Soʻz elchixonaga: Bunday urushlarning barchasiga AQSh va Isroil aybdor

Kecha, 24 iyun kuni Eron Islom Respublikasining Oʻzbekistondagi elchixonasi mamlakat pozitsiyasini bildirish uchun oʻzbekistonlik jurnalistlar bilan matbuot anjumani uyushtirildi.

Jurnalistlar bilan Eron Islom Respublikasining Oʻzbekistondagi elchixonasi muvaqqat ishlari boʻyicha masʼul vakili Husayn Parvarish suhbatlashdi. Elchixona rasmiysi mavjud real vaziyatdagi Oʻzbekiston pozitsiyasi va Eronni qoʻllab-quvvatlagan Oʻzbekiston xalqiga oʻz minnatdorchiligini bildirdi. 

"Keyingi 10-12 kun davomida biz mana shu, birinchidan, sionistik rejim rejimning bosh vaziri rahbarligida va bevosita Amerika Qoʻshma Shtatlari hamda boshqa uning ittifoqchilari qoʻllab-quvvatlovida amalga oshirilgan judayam yirik tajovuzning xalqaro huquq, qonun-qoidalari va normalarini, jumladan, Birlashgan Millatlar Tashkiloti Nizomining qoʻpol ravishda buzilish holatlarining guvohi boʻldik", — dedi Husayn Parvarish.

Unga koʻra, Eron uranni boyitish va sanksiyalardan chiqish boʻyicha muzokaralar olib borayotgan bir vaqtda AQSh Eronning Fordo, Isfaxon va Natanz hududlarini bombardimon qilgan.

Elchixona rasmiysining aytishicha, Isroilning bu xatti-harakati xalqaro qonun-qoidalarga zid. Jumladan, BMT Nizomining 2-moddasi toʻrtinchi bandiga qarshi keladigan bir xatti-harakat hisoblanadi.

Foto: Paradigma.uz. Eron Islom Respublikasining Oʻzbekistondagi elchixonasi muvaqqat ishlari boʻyicha masʼul vakili Husayn Parvarish.

"Birlashgan Millatlar Tashkiloti Nizomining 51-moddasiga asosan, yaʼni ushbu moddada, barcha mustaqil davlatlarning oʻz-oʻzini mudofaa qilish, oʻzini-oʻzini himoya qilish huquqi aniq-tiniq belgilab qoʻyilgan. Mana shu moddaga asoslangan holda, Eron oʻzining barcha harbiy qudratidan foydalangan holda, oʻzini ushbu tajovuzdan himoya qilishga kirishdi", — dedi u.

Bundan tashqari, Isroil raketalari, Isroil aviatsiyasi Eron Islom Respublikasi hududini nishonga olayotgan, uni bombardimon qilayotgan bir holatda ham, Eron Islom Respublikasi Tashqi ishlar vazirligi boshchiligidagi vakillar Jeneva shahrida Yevropaning uchta davlati bilan bevosita Yevropa Ittifoqining tashqi siyosat boʻyicha masʼul shaxsi va Islom hamkorlik tashkilotining tegishli masʼullari ishtirokida muzokaralar olib borayotgan payti Amerika Qoʻshma Shtatlari Eronga hujumni amalga oshirdi va hujum davomida Eron Islom Respublikasining Fordo, Natanz va Isfaxon shaharlarida joylashgan yadro energetikasi inshootlariga zarbalar berildi.

Foto: Paradigma.uz. Eron Islom Respublikasining Oʻzbekistondagi elchixonasi muvaqqat ishlari boʻyicha masʼul vakili Husayn Parvarish.

Elchixona rasmiysiga koʻra, Eron hech qachon yadro qurolini qoʻlga kiritishga harakat qilmagan. Eron Oliy rahnamosi Oyatulloh Ali Xomanyni mamlakatning yadro quroliga ega boʻlishi boʻyicha taqiq qoʻygan.

"Eron Islom Respublikasi oʻsha yadro qurollarini tarqatmaslik toʻgʻrisidagi shartnomaning bir aʼzosi sifatida tinch maqsadlardagi yadro energetikasidan foydalanish, jumladan tibbiyotda, qishloq xoʻjaligida, ilm-fan, ishlab chiqarish va sanoatning turli yoʻnalishlarida, yadro energetikasidan foydalanishga boʻlgan huquqini oʻzida saqlab qoladi va hech qachon ushbu huquqidan voz kechishni rejalashtirmayapti", — dedi u.

Husayn Parvarishga koʻra, Isroil Eron yadro quroliga ega boʻlishga harakat qilmayotganini yaxshi biladi. Isroil  oʻzlarining Nildan Furotgacha degan bir gʻoyasini amalga oshirish uchun aynan mana shu Eron yadro qurolini qoʻlga kiritishga harakat qilyapti degan bahona bilan Eronga qarshi hujum qilmoqda.

Shuningdek, u AQSh prezidenti Donald Tramp ham Eronning harbiy qudratini toʻliq hisobga olmay turib Eron Islom Respublikasiga hujum qilgan va keyinchalik Eronning harbiy qudrati ular oʻylaganchalik zaif emasligini bilishgani haqida soʻz ochdi.

"Mana shu sharoitda Yevropa davlatlarining, demak, ushbu mojaroga nisbatan tutgan pozitsiyasi oʻta ham mantiqsiz, chunki bular hujumga uchrab turgan Eron Islom Respublikasidan oʻzini tutib turishni soʻrashyapti. Hatto buni eshitishning oʻzi judayam kulgili gap. Eron Islom Respublikasi bundan buyon mana shu mojaro bilan bogʻliq ravishda dunyoning qaysi nuqtasida, qanaqa shaklda, qanaqa koʻrinishda boʻlishidan qatʼi nazar, amalga yuz beradigan barcha hodisalar uchun, barcha javobgarlikni Amerika Qoʻshma Shtatlari va sionistik rejim yelkasiga yuklaydi",  — dedi Eron Islom Respublikasining Oʻzbekistondagi elchixonasi muvaqqat ishlari boʻyicha masʼul vakili Husayn Parvarish.