Rossiyada oʻldirilgan Qobiljonning onasiga uy berildi

Bu haqda Asia-Plus nashri xabar qildi.

Maʼlum qilinishicha, 22 dekabr kuni jurnalistlar marhum bolaning uyiga tashrif buyurgan. Qobiljonning qarindoshlaridan biri Nilufar Safayovaga uy taqdim etilganini maʼlum qilgan. Biroq uy qachon va qay tartibda berilgani haqida aniq maʼlumot berilmagan. Nashrning boshqa manbalari esa bu maʼlumotni na tasdiqlagan, na inkor etgan.

Qobiljonning qarindoshi Sherzod Alizodaning aytishicha, uy mamlakat hukumati nomidan berilgan, ammo aynan qaysi davlat organi tomonidan taqdim etilgani ochiqlanmagan.

Voqeadan xabardor manbalarga koʻra, 22 dekabr kuni ertalab Tojikistonning bir qator yuqori lavozimli amaldorlari marhum bolaning oilasiga tashrif buyurib, hamdardlik bildirgan. Ularning ismlari oshkor qilinmagan.

Shuningdek, oila hozirda moliyaviy yordamga muhtoj emasligini maʼlum qildi:

«Biz yordam bergan va bermoqchi boʻlgan barchadan minnatdormiz. Shu bilan birga, jamoatchilikka shuni maʼlum qilamizki, hozir biz yordamga muhtoj emasmiz. Qobiljonning onasi nomiga ochilgan bank hisob raqami yopilgan. Shu sababli hech qanday hisob raqamlariga pul oʻtkazmaslikni soʻraymiz», — deyiladi bayonotda.

Maʼlumotlarga koʻra, Qobiljonning jasadi olib chiqilgan uy hozirgacha ochiq boʻlib, mamlakatning turli hududlaridan kelgan fuqarolar hamdardlik bildirish uchun tashrif buyurmoqda.

Qobiljon Aliyevning oʻldirilishi haqida

Qobiljon Aliyev 16 dekabr kuni Moskva viloyatidagi maktabda rossiyalik oʻsmir tomonidan pichoqlab oʻldirilgan. Hujum qilgan oʻsmir maktabga “No lives matter” yozuvi tushirilgan futbolkada kelgani, oʻquvchilardan millatini soʻrab, Qobiljonni bir necha bor pichoqlagani aytilmoqda. Hodisadan soʻng u marhum bola fonida suratga tushgan. Hozirda gumonlanuvchi oʻsmir vaqtinchalik hibsda saqlanmoqda.

17 dekabr kuni Tojikiston Tashqi ishlar vazirligi ushbu hujumni millatlararo nafrat asosida sodir etilgan jinoyat sifatida keskin qoralab, Rossiya elchisini chaqirgan va nota topshirgan.

22 dekabr kuni Tojikiston va Rossiya prezidentlari uchrashuv oʻtkazgan. Rossiya prezidenti Vladimir Putin hodisani terrakt deb baholab, Qobiljonning oilasiga hamdardlik bildirgan va aybdorlar jazolanishini taʼkidlagan. Tojikiston prezidenti Emomali Rahmon esa ushbu jinoyat boʻyicha tergovni shaxsan nazoratga olishni soʻragan.