Turkiya Gʻazoga 5 ming tonnadan ortiq gumanitar yordam joʻnatdi

Turkiya hukumati 5-may kuni Gʻazo sektoriga 5 ming tonnadan ortiq gumanitar yordam yuklari ortilgan kema joʻnatgan. Bu haqda Anadolu nashri xabar berdi.

Manbada aytilishicha, 5 ming tonnadan ortiq yordam yuklari ortilgan kema “Yaxshilik kemasi” missiyasi doirasida yakshanba kuni Gʻazo sektoriga joʻnab ketgan. Gumanitar yordam oziq-ovqat, bolalar parvarishi uchun mahsulotlar hamda dori-darmonlardan iborat ekanligi aytilgan.

Turk Qizil yarim oy jamiyati ham turk hukumati rahbarligida Yaqin Sharqdagi gumanitar halokat zonasiga jami 5066 tonna yordam yuklari joʻnatilganini tasdiqlagan. Yuklar ortilgan kema Turkiya janubidagi Mersin shahridan joʻnab ketgani xabar qilingan.

“Biz hozirgacha yuborilgan gumanitar yordam kemalari ichida eng yirik tonnali kemani joʻnatmoqdamiz. Turkiyaning yordam operatsiyasi gʻazoliklar oʻz uylariga toʻliq qaytguncha va tinchlik qaror topguncha davom etadi”, — degan Turkiya Qizil yarim oy jamiyati raisi oʻrinbosari Ramazon Saygili.

Birlashgan Millatlar Tashkiloti maʼlumotlariga koʻra, Gʻazodagi urush anklav aholisining 85 foizini oziq-ovqat, toza suv va dori-darmon blokadasi sharoitida ichki koʻchishga majbur qilgan.