Oʻzbekiston va Pokiston kiberxavfsizlik sohasida hamkorlikni kengaytiradi

Muloqot chogʻida ikki mamlakat oʻrtasida kiberxavfsizlik sohasida hamkorlikni rivojlantirish, tajriba almashish, raqamli infratuzilmani himoya qilishga ilgʻor texnologiyalarni tatbiq etish, qoʻshma ilmiy-tadqiqot loyihalar orqali kadrlar salohiyatini oshirish masalalari muhokama qilindi, deb xabar qilmoqda "Dunyo" AA muxbiri.

"Raqamli Oʻzbekiston – 2030" strategiyasi doirasida mamlakatimizda amalga oshirilayotgan islohotlar, elektron hukumat tizimining imkoniyatlari va IT-parklar faoliyati haqida maʼlumot berildi.

Markaz bosh direktori Hayder Abbas oʻzi rahbarlik qilayotgan tashkilot faoliyati, milliy darajada kibertahdidlar monitoringi olib borish, tarmoqlar darajasida sohaviy markazlar faoliyatini muvofiqlashtirish, tashkilotlar darajasida esa ichki axborot infratuzilmasini himoya qilish borasida koʻrilayotgan choralar bilan haqida soʻzlab berdi.

Shuningdek, Markaz davlat xizmatchilari va taʼlim muassasalari uchun muntazam seminarlar, malaka kurslari va konferensiyalar tashkil etib kelayotgani qayd etildi. Amalga oshirilayotgan 4 bosqichli oʻquv dasturi strategik qarorlar qabul qilishdan tortib, texnik koʻnikmalar va raqamli savodxonlikni oshirishga qaratilgani taʼkidlandi.

Uchrashuv yakunida kiberhodisalarga tezkor javob qaytarish va tahdidlar haqida axborot almashish, qoʻshma oʻquv-mashgʻulotlari va simulyatsiyalar oʻtkazish, davlat xizmatchilari va talabalar uchun qisqa muddatli oʻquv kurslari tashkil etish, sunʼiy intellekt asosida tahdidlarni aniqlash, raqamli ekspertiza va xavfsiz aloqa tizimlari sohasida ilmiy-tadqiqotlar olib borish kabi yoʻnalishlar da hamkorlik istiqbollari belgilab olindi.

Oʻzbekiston va Pokiston oʻrtasida raqamli xavfsizlik sohasida hamkorlikni izchil davom ettirish, ustuvor vazifalar va aniq amaliy yoʻnalishlarni belgilab olish uchun oʻzaro tashriflarni tashkil etish, ikki davlat mutasaddi idoralari oʻrtasida muntazam onlayn uchrashuv va muzokaralar oʻtkazishga kelishildi.