Исроил Ливанда “Ҳизбуллоҳ”га қарши қуруқликдан операциялар бошлади

Исроил ҳарбийларининг таъкидлашича, мудофаа тизимини мустаҳкамлаш мақсадида қўшинлар Ливан чегарасининг бир неча нуқталарига жойлаштирилган. Бу кучлар Исроилнинг 2024 йил ноябрдаги ўт очишни тўхтатиш келишувидан бери Ливан жанубида сақлаб турган бешта позициясига қўшимча сифатида киритилган.

Ливанлик гуруҳ АҚШ ва Исроилнинг Эронга қарши операциялари давомида олий раҳнамо Оятуллоҳ Али Хоманаийнинг ўлдирилишига “қасос” сифатида яҳудий давлатга қарши ҳужумга ўтган. Бунга жавобан Исроил ҳам Ливанга зарбалар бермоқда.

Шунга қарамай, САҲАЛ Эрон билан боғлиқ вазият барқарорлашгунча (ёки умуман) Ливанга кенг кўламли босқин бошланиши эҳтимоли пастлигини билдирмоқда.

“Ҳизбуллоҳ”нинг заифлашиши: Эрон омили ва ички инқироз

Исроил разведкасига кўра, “Ҳизбуллоҳ” Эроннинг тайёргарлиги ва йўл-йўриқларисиз парчаланиб кетиш хавфи остида. Ҳозирда Эрон режими ўзи омон қолиш учун курашаётгани сабабли гуруҳга ёрдам сезиларли даражада камайган. Уруш бошланганидан бери гуруҳнинг деярли ягона даромад манбаи бўлган Эрон маблағларидан маҳрум бўлиш “Ҳизбуллоҳ”га ҳалокатли зарба беради.

Шунингдек, гуруҳ 2023–2024-йillardagi можаролар пайтида кўрилган зарарлар учун товон пули олмаган ўз тарафдорларининг ҳам ғазаби билан дуч келмоқда. САҲАЛ ушбу омиллар Ливан миллий армияси томонидан “Ҳизбуллоҳ”ни қуролсизлантиришга олиб келиши мумкинлигини тахмин қилмоқда.

Ракета ҳужумлари ва Радван бўлинмаси

“Ҳизбуллоҳ”нинг Исроилга ҳужумларига тўхталар экан, ҳарбийлар аксарият ракеталар денгизга ёки очиқ майдонларга тушганини, фақат битта ракета уриб туширилганини қайд этди.

Исроил томони Ливан армиясининг “Ҳизбуллоҳ”ни жанубга, Исроил чегараси томон ҳаракатланишдан тўхтатишга уринишларини эътироф этди. Маълум қилинишига кўра, гуруҳнинг 2 000 кишилик Радван махсус бўлинмасининг асосий қисми хавфсизлик нуқтаи назаридан Бейрутда қолган, жанубга фақат кичик бир қисми етиб келган.

Исроил мудофаа вазири Исраел Кацга кўра, Ливанга қарши уюштирилаётган ҳужумларда нишон гуруҳнинг янги раҳбари Шайх Наим Қосим эканини очиқлади.

“Ливан ҳукумати ва армияси "Ҳизбуллоҳ"ни қуролсизлантириш бўйича кўп марта огоҳлантирилган эди. Улар ҳаракат қилмади, энди эса биз ўзимизни қандай ҳимоя қилишни биламиз. Ушбу кампания нафақат Эроннинг, балки ‘Ҳизбуллоҳ’нинг ҳам бутунлай тор-мор этилиши билан якунланади”, деди САҲАЛ Бош штаби бошлиғи, генерал-лейтенант Эяль Замир.