Непал–Хитой чегарасидаги селда 472 киши ҳалок бўлди

Непал полицияси маълумотларига кўра, мамлакат ҳудудида ҳалок бўлганлар сони 469 нафарга етган. Хитойнинг Тибет автоном ҳудудида эса камида уч киши ҳалок бўлган. 

Фалокат 26 август куни Непалнинг Хитой билан чегарадош тоғли ҳудудлари ва Тибетда юз берган. Кучли сув, лой, муз ва тоғ жинслари оқими қишлоқлар, йўллар, кўприклар ҳамда энергетика инфратузилмасига катта зарар етказган.

1,5 мингга яқин киши бедарак

Ҳозирча Непалда 977 киши, Хитойнинг Тибет ҳудудида эса 558 киши бедарак йўқолган деб ҳисобланмоқда. Хитой томонида бедараклар орасида 260 нафар хорижлик бор. 

Қидирув-қутқарув ишлари давом этмоқда. Бироқ вайрон бўлган йўллар, кўприклар ва алоқа инфратузилмаси қутқарувчилар ишини қийинлаштирмоқда.

Фалокат ҳудудида кўплаб хорижлик сайёҳлар ва зиёратчилар бўлгани сабабли бедараклар орасида турли давлат фуқаролари ҳам бор.

Фалокатга музлик қулаши сабаб бўлган 

Дастлаб ҳодисага зилзила сабаб бўлган бўлиши мумкинлиги тахмин қилинган. Бироқ кейинги таҳлиллар бошқа манзарани кўрсатмоқда.

Спутник тасвирлари ва геологик маълумотларга кўра, Ҳимолайдаги Лангтанг Лирунг тоғлари яқинида музликнинг бир қисми тоғ жинслари билан бирга қулаган. Муз ва тошлар Лхенде-Кхола дарёси ўзанига тушиб, катта миқдордаги сув ва лой оқимини юзага келтирган. 

Оқим айрим жойларда сониясига 50 метрга яқин тезликда ҳаракатлангани айтилмоқда. Натижада одамларнинг хавфсиз ҳудудга чиқиб кетиши учун вақт жуда кам бўлган.

Янги тошқин хавфи бор

Фалокатдан сўнг Непал ва Хитой ҳудудида дарёлар ўзани тўсилиши натижасида бир нечта сув ҳавзалари пайдо бўлган. Мутахассислар улардаги сув сатҳи яна кўтарилса, янги тошқинлар юзага келиши мумкинлигидан хавотирда. 

Хитой томонида мутахассислар хавфли ҳудудларни ҳаводан текшириб, тўсилган кўллардаги сув миқдорини назорат қилмоқда. Айрим ҳудудларда сув босимини камайтириш учун махсус каналлар очиш имконияти ҳам ўрганилмоқда. 

Мутахассислар иқлим ўзгариши ва ҳароратнинг кўтарилиши тоғлардаги музликлар ва жинсларнинг барқарорлигига таъсир қилиши мумкинлигини таъкидламоқда. Бироқ ҳозирча иқлим ўзгаришини ушбу фалокатнинг бевосита ягона сабаби деб баҳолашга эрта. 

Қидирув-қутқарув ишлари давом этаётгани сабабли қурбонлар ва бедараклар сони яна ўзгариши мумкин.