Истанбулда ўзбекистонлик аёл дори воситасидан заҳарланиш оқибатида вафот этди

2026 йил 19 сентябр куни Истанбул шаҳрида фармацевтик воситадан заҳарланиш оқибатида Ўзбекистон фуқароси М.М. вафот этди. Бу ҳақда Ўзбекистоннинг Истанбулдаги Бош консулхонаси хабар берди.

Маълум қилинишича, аёл касаллик даврида уй шароитида норасмий шифокорлар ёрдамида даволанган. Даволаниш жараёнида қабул қилинган дори воситаларининг ножўя таъсири оқибатида беморнинг аҳволи оғирлашган, қонида инфекция ривожланган ва организмида кучли реакция кузатилган.

Шунга қарамай, у ўз вақтида шифохонага олиб борилмаган ва уй шароитида даволаниши давом эттирилган.

Беморнинг аҳволи жиддийлашгач, у дастлаб Мармара шифохонасига олиб борилган. У ерда беморни жонлантириш бўлимига жойлаштириш имкони бўлмагани сабабли Карта‌л туман шифохонасига кўчирилган.

Шифокорлар томонидан зарур тиббий муолажалар кўрсатилганига қарамай, аёлнинг ҳаётини сақлаб қолишнинг имкони бўлмаган.

Марҳуманинг жасади Бош консулхона ҳамда Ўзбекистон Республикаси Миграция агентлиги ҳамкорлигида Ўзбекистонга қайтарилган.

Бош консулхона Туркияда бўлиб турган ватандошларни ўз саломатлигига масъулият билан ёндашишга чақирди. Хусусан, дори воситаларини шифокор тавсиясисиз қабул қилмаслик, норасмий ва тегишли малакага эга бўлмаган шахслар томонидан даволанишдан сақланиш тавсия этилган.

Соғлиқ ҳолати кескин ёмонлашган тақдирда эса вақтни бой бермасдан расмий тиббиёт муассасаларига мурожаат қилиш зарурлиги таъкидланган.