Aydar-Arnasoy koʻllaridan baliq ovlaganlarga 423 mln soʻm jarima qoʻllanildi

Qayd etilishicha, Ekologiya, atrof-muhitni muhofaza qilish va iqlim oʻzgarishi vazirligining Aydar-Arnasoy koʻllar tizimini nazorat qilish boshqarmasi xodimlari tomonidan 2025 yilning yanvar-fevral oylarida 125 ta nazorat chora-tadbirlari amalga oshirilgan. Reydlar davomida 94 ta qoidabuzarlik qayd etilgan. 

Shuningdek, 26-28 fevral kunlari Aydar-Arnasoy koʻllari hududida suvda qolib ketgan noqonuniy baliq ovlash toʻrlarini bartaraf etish boʻyicha reyd oʻtkazilgan. 

Natijada Navoiy viloyatidagi Aydarkoʻldan har biri 100 metr uzunlikdagi 100 dona, Tuzkon koʻlidan har biri 100 metr uzunlikdagi 70-80 dona, Arnasoy koʻlidan esa har biri 100 metr uzunlikdagi 50-60 dona toʻr olib tashlangan. 

Avvalroq, Jizzax viloyati Arnasoy tumani hududida oʻtkazilgan reyd davomida hayvonlar dunyosiga 487 million soʻm miqdorida zarar yetkazilgan noqonuniy baliq ovlash holati aniqlangan edi.