Qirg‘iziston BMT Xavfsizlik kengashining vaqtinchalik a’zosi etib saylandi

Qirg‘iziston to‘rtinchi turda 142 ta ovoz to‘plab, Osiyo-Tinch okeani mintaqasi davlatlari guruhidan bir o‘ringa da’vogarlik qilgan Filippinni ortda qoldirdi.

Bugungi saylovlar yakuniga ko‘ra:

• G‘arbiy Yevropa va boshqa davlatlar guruhidan Avstriya va Portugaliya;
• Lotin Amerikasi va Karib havzasi mamlakatlari guruhidan Trinidad va Tobago;
• Afrika davlatlari guruhidan Zimbabve ham Xavfsizlik Kengashi tarkibiga kiradi. 

Saylanish uchun mamlakatlar a’zo davlatlar umumiy ovozlarining uchdan ikki qismini, ya’ni 127 tasini qo‘lga kiritishi kerak edi.

Xavfsizlik Kengashi tarkibiga 15 ta mamlakat kiradi. Ulardan beshtasi – Buyuk Britaniya, Xitoy, Rossiya, AQSH va Fransiya veto huquqiga ega doimiy a’zolardir. Yana o‘nta mamlakat ikki yil muddatga saylanadi. 

2026-yil oxirida beshta doimiy bo‘lmagan a’zo – Gretsiya, Daniya, Pokiston, Panama va Somalining vakolat muddati tugaydi. Ularning o‘rnini bugun saylangan davlatlar egallaydi.

Xalqaro tinchlik va xavfsizlikni saqlash asosiy mas’uliyati Xavfsizlik Kengashi zimmasidadir. Ba’zi hollarda Xavfsizlik Kengashi xalqaro tinchlik va xavfsizlikni saqlash yoki tiklash maqsadida sanksiyalarni qo‘llashi, hatto, kuch ishlatishga ruxsat berishi mumkin.