Nodirbek Abdusattorov Niderlandiyadagi nufuzli shaxmat turnirida gʻalaba qozondi

Oʻzbekistonlik grossmeyster Nodirbek Abdusattorov Masters guruhi doirasidagi 13-tur uchrashuvida hindistonlik Arjun Erigaisi ustidan gʻalaba qozondi. Ushbu natijadan soʻng Abdusattorov ochkolari sonini 9 taga yetkazib, turnir jadvalida yakka peshqadam sifatida birinchi oʻrinni egalladi va chempionlikni qoʻlga kiritdi.

Nodirbek turnirning ilk turida turkiyalik Yagʻiz Kaan Erdogmush bilan durang oʻynagan boʻlsa, 2-turda hindistonlik Rameshbabu Praggnanandha ustidan zafar quchdi. 3-turda yana bir hindistonlik shaxmatchi Aravindh Chitambaram bilan durang qayd etdi. 4-turda esa oq donalarda Chexiya vakili Nguyen Tay Day Vanni magʻlub etdi.

5-turda Abdusattorov qora donalarda AQSh vakili Xans Nimann bilan durang oʻynadi. 6-turda amaldagi jahon chempioni Gukesh Dommaraju, 7-turda esa germaniyalik Vinsent Keymer ustidan gʻalaba qozondi. 8-turda niderlandiyalik Anish Giriga qarshi bahsda imkoniyatni boy berdi.

Abdusattorov 9-turda Javohir Sindorov, 10-turda sloveniyalik Vladimir Fedoseyev, 11-turda esa niderlandiyalik Yorden van Forest bilan durang oʻynadi. 31 yanvar kuni boʻlib oʻtgan 12-tur bahsida esa germaniyalik Mattias Blyubaum ustidan gʻalaba qozondi.

Shu tariqa, oʻzbekistonlik shaxmatchi 13 uchrashuvda 9 ochko toʻplab, 2026 yilgi Tata Steel Chess musobaqasining bosh sovriniga sazovor boʻldi.

Maʼlumot uchun, Nodirbek Abdusattorov avvalgi yillarda ham Tata Steel Chess turnirida sovrinli oʻrinlarni egallab kelgan. U 2023 yilda ikkinchi oʻrinni, 2024 va 2025 yillarda esa uchinchi oʻrinni qoʻlga kiritgan. 2026 yilda esa chempionlikka erishdi.