Исроил фосфорли қурол ишлатгани маълум бўлди

Ташкилот геолокация орқали тасдиқланган бир нечта сурат ва видеоларни таҳлил қилди. Улар турар-жой маҳалласи устида ҳавода портлатилган фосфор снарядлари ҳамда уйлар ва автомобилларда ёнғинлар келиб чиққанини кўрсатди.

Оқ фосфор ҳаво билан алоқага кириши билан дарҳол ёниб кетадиган жуда хавфли кимёвий модда ҳисобланади. У артиллерия снарядлари, бомбалар ва ракеталар таркибида қўлланилиб, портлаш пайтида юқори ҳарорат ва қалин оқ тутун ҳосил қилади. 

Бу модда тарқалганда атрофдаги уйлар, автомобиллар, ўрмонлар ва қишлоқ хўжалиги майдонларида тезда ёнғин келиб чиқиши мумкин. Оқ фосфор инсон терисига тегса, у катта куйишларга ва суяккача етадиган оғир жароҳатларга сабаб бўлади. 

Шунингдек, унинг тутуни нафас олиш тизимига зарар етказиб, заҳарланиш, кўз ва ўпка шикастланишига олиб келиши мумкин. Бундай жароҳатлар кўпинча узоқ муддатли азоб ва доимий тиббий муолажаларни талаб қилади.

Human Rights Watch таҳлилига кўра, Ёҳморда қўлланган оқ фосфорли снарядлар аҳоли зич яшайдиган ҳудуд устида ҳавода портлатилган. Бундай усул 125–250 метр радиусда ёнувчи фосфор бўлакларини тарқатади. Халқаро гуманитар ҳуқуққа кўра, аҳоли яшайдиган жойларда бундай қуроллардан фойдаланиш эҳтимолий зарарни олдини олиш талабларига зид ҳисобланади.

Ҳуқуқ ҳимоячилари халқаро ҳамжамиятни мазкур ҳолатни текширишга чақирмоқда. Ташкилот айрим давлатлар, жумладан АҚШ, Британия ва Германияни Исроилга ҳарбий ёрдам ва қурол етказиб беришни вақтинча тўхтатиш масаласини кўриб чиқишга даъват қилди. 

Шунингдек, фуқароларни муҳофаза қилиш учун ёнувчи қуроллар бўйича халқаро ҳуқуқий нормаларни кучайтириш зарурлиги таъкидланди.