"Бизнесни ривожлантириш банки" жарима тўлайдиган бўлди

Қайд этилишича, мазкур ҳолат Рақобат қўмитаси томонидан ўтказилган мониторинглар натижасида аниқланилган. Тошкент шаҳрида жойлашган реклама мониторларида, шунингдек интернет платформасида "Бизнесни ривожлантириш банки" АТБ томонидан тақдим этилган кредитлар ҳақидаги маълумотларда қарз шартлари тўлиқ ва аниқ кўрсатилмаган. 

Жумладан, "Бизнесга 1,5 миллиард, йиллик 17,5 фоиз" ва "От 17 % годових, ипотека на квартиру в новостройке" каби мазмундаги рекламаларда кредитнинг муҳим шартлари, фоиз ставкаларининг аниқ шарти, тўлов муддати ва бошқа талаблар қайд этилмаган. 

Юқоридаги ҳолатлар юзасидан қўмита Махсус комиссияси томонидан "Бизнесни ривожлантириш банки" АТБга нисбатан "Реклама тўғрисида"ги ҳамда "Истеъмолчиларнинг ҳуқуқларини ҳимоя қилиш тўғрисида"ги қонунларининг тегишли моддалари талаблари бузилиши юзасидан иш қўзғатилиб, ишни кўриб чиқиш якунлари юзасидан молиявий жарима қўллаш юзасидан қарор қабул қилинган.

"Шунингдек, қонунбузилиш ҳолатини бартараф этиш ва келгусида йўл қўймаслик юзасидан кўрсатма берилди", дейилади қўмита томонидан берилган хабарда.