updated: 22.03.2026, 17:16

ЖССТ огоҳлантирган йўтал сироплари Ўзбекистонда рўйхатдан ўтказилмаган

Жаҳон соғлиқни сақлаш ташкилоти (ЖССТ) томонидан 13 октябрь куни эълон қилинган тиббий маҳсулот бўйича огоҳлантиришда Ҳиндистонда ишлаб чиқарилган бир нечта йўтал сиропларида инсон саломатлиги учун хавфли моддалар борлиги маълум қилинди.

Ўзбекистон

16.10.2025, 18:06

Lotinchada

Улашиш:

ЖССТ огоҳлантирган йўтал сироплари Ўзбекистонда рўйхатдан ўтказилмаган

ЖССТ маълумотларига кўра, Sresan Pharmaceutical, Rednex Pharmaceuticals ва Shape Pharma компаниялари томонидан ишлаб чиқарилган “COLDRIF”, “Respifresh TR” ва “ReLife” номли сиропларнинг айрим серияларида диэтиленгликол (DEG) моддаси аниқланган. Мазкур модда организм учун заҳарли бўлиб, Ҳиндистоннинг айрим ҳудудларида болалар ўлими ҳолатларига сабаб бўлган.

Ўзбекистон Соғлиқни сақлаш вазирлиги ҳузуридаги Фармацевтика маҳсулотлари хавфсизлиги маркази бу ҳолат юзасидан расмий изоҳ берди.

Марказ маълумотида таъкидланишича, мазкур компаниялар томонидан ишлаб чиқарилган дори воситалари, жумладан юқорида тилга олинган сироплар, Ўзбекистонда давлат рўйхатидан ўтказилмаган.

Шунингдек, мамлакатга кириб келаётган барча дори воситалари аккредитациядан ўтган синов лабораторияларида текширилади ва фақат ижобий хулоса олинганидан сўнггина сертификатланиб, сотувга чиқарилиши мумкин. Сертификатсиз дори воситаларининг божхона ҳудудидан олиб чиқилиши ва айланишига йўл қўйилмайди.

Маълумот учун, 2024 йил 8 июлда қабул қилинган буйруққа асосан, Ўзбекистонга импорт қилинаётган сироп шаклидаги препаратларда этиленгликол ва диэтиленгликол моддалари мавжудлигини мажбурий текшириш амалиёти жорий этилган. Бу орқали дори воситалари хавфсизлигини таъминлаш ҳамда аҳоли саломатлигига таҳдид солиши мумкин бўлган ҳолатларни олдини олиш механизми йўлга қўйилган.

Ўзбекистон

16.10.2025, 18:06

Улашиш:

#ЖССТ #ДОРИ #сироп

мавзуга оид янгиликлар