Тошкент вилоятида 41 ёшли эркак 4 ёшли қизни зўрламоқчи бўлди

Қайд этилишича, юқоридаги ҳолат бўйича жорий йилнинг 2 октябрь куни Янгийўл тумани ИИБга мурожаат келиб тушган. Аризада фуқаро 2020 йилда туғилган фарзандига номаълум эркак томонидан зўравонлик қилинганини билдирган. 

Мазкур ҳолат текширилганда ёш қизга тежоғлик қилишда гумонланаётган шахс 1983 йилда туғилган, Янгийўл туманида истиқомат қилувчи фуқаро экани аниқланган. Шунингдек, ўрганишлар жараёнида гумонланувчининг ёнидан 15 грамм гиёҳвандлик моддаси ҳам чиққан. 

ИИБ ходимлари томонидан мазкур фуқаронинг хонадони текширилганда ошхонасидан 20 дан ортиқ елим идишларда майдаланган ва қуруқ ҳолдаги "Марихуана" гиёҳвандлик моддалари борлиги ҳам аниқланган ва процессуал тартибда ҳужжатлаштирилиб олинган.

"Ҳолат юзасидан фуқаро Ўзбекистон Республикаси Жиноят кодексининг 119-моддаси 4-қисми ва 25/273-моддасининг 5-қисми билан жиноят иши қўзғатилиб, процессуал тартибида ушланди. Унга нисбатан жиноят иши бўйича дастлабки тергов ҳаракатлари олиб борилмоқда, натижаси бўйича қўшимча равишда ахборот берилиши таъминланади", дейилади хабарда.

Бироқ ахборот хизмати раҳбари томонидан ёзилган постда юқорида қайд этилган 4 ёшли қизга нисбатан ҳақиқатдан ҳам зўравонлик бўлгани тўғрисида қўшимча маълумот берилмаган. 

Эслатиб ўтамиз, аввалроқ Тошкентда 60 ёшли шахс вояга етмаган қизга тегажаклик қилгани учун 3 сутка қамоқ жазоси белгиланганди.