Туз одам саломатлигига қандай салбий оқибатларни келтириб чиқаради?

Қайд этилишича, тузнинг кўп истеъмол қилиниши организмда суюқликни ушлаб туриш, семириш, гипертония хавфининг ортиши, буйракларга салбий таъсир кўрсатиши, кальцийни ювиб юбориши ҳамда ошқозон-ичак трактининг ёмонлашиши каби салбий оқибатларни келтириб чиқаради. 

Аммо бирданига ва бутунлай туздан воз кечилса, иштаҳа билан боғлиқ муаммолар, кўнгил айниши, бош ва мушаклардаги оғриқлар, бош айланиши, қон босимининг пасайиши каби қатор нохуш аломатларга дуч келиш мумкин. 

ЖССТ маълумотларига кўра, катталар истеъмоли учун оптимал кунлик туз миқдори 5 граммдан ошмаслиги керак. Бу тахминан бир чой қошиқдан бироз камроқ. Ушбу меъёр фақат гипертония, ошқозон-ичак ёки буйрак касалликлари бўлмаган соғлом одамларга мос келади.

"Инсон кун бўйи қанча туз истеъмол қилганини кузатиб бориши жуда қийин. Шунинг учун асосан таъм рецепторларига таяниш, шунингдек, ҳар бир маҳсулотни истеъмол қилишдан олдин унинг таркибига эътибор қаратишга одатланиш керак", дейилади ССВ томонидан берилган хабарда. 

Эндокринологлар фикрига кўра, шўр овқатларга бўлган иштиёқ кўпинча танада магний камлигидан далолат беради, бу 300 га яқин ферментлар ишида иштирок этадиган, қувват ишлаб чиқариш, асаб импульсларини ўтказиш ва хотиржам ҳиссий фон учун жавоб берадиган минерал ҳисобланади.

Туз истеъмолини камайтиришнинг энг яхши усули уни бошқа зираворлар билан алмаштиришдир. Овқатга хушбўй зираворлар қўшиш орқали таъм ҳиссингизни бойитиш мумкин. Шунда инсон аста-секин бунга кўникади ва шўр маҳсулотларни истеъмол қилиш истагидан халос бўлади.