Tuz odam salomatligiga qanday salbiy oqibatlarni keltirib chiqaradi?

Qayd etilishicha, tuzning koʻp isteʼmol qilinishi organizmda suyuqlikni ushlab turish, semirish, gipertoniya xavfining ortishi, buyraklarga salbiy taʼsir koʻrsatishi, kalsiyni yuvib yuborishi hamda oshqozon-ichak traktining yomonlashishi kabi salbiy oqibatlarni keltirib chiqaradi. 

Ammo birdaniga va butunlay tuzdan voz kechilsa, ishtaha bilan bogʻliq muammolar, koʻngil aynishi, bosh va mushaklardagi ogʻriqlar, bosh aylanishi, qon bosimining pasayishi kabi qator noxush alomatlarga duch kelish mumkin. 

JSST maʼlumotlariga koʻra, kattalar isteʼmoli uchun optimal kunlik tuz miqdori 5 grammdan oshmasligi kerak. Bu taxminan bir choy qoshiqdan biroz kamroq. Ushbu meʼyor faqat gipertoniya, oshqozon-ichak yoki buyrak kasalliklari boʻlmagan sogʻlom odamlarga mos keladi.

"Inson kun boʻyi qancha tuz isteʼmol qilganini kuzatib borishi juda qiyin. Shuning uchun asosan taʼm retseptorlariga tayanish, shuningdek, har bir mahsulotni isteʼmol qilishdan oldin uning tarkibiga eʼtibor qaratishga odatlanish kerak", deyiladi SSV tomonidan berilgan xabarda. 

Endokrinologlar fikriga koʻra, shoʻr ovqatlarga boʻlgan ishtiyoq koʻpincha tanada magniy kamligidan dalolat beradi, bu 300 ga yaqin fermentlar ishida ishtirok etadigan, quvvat ishlab chiqarish, asab impulslarini oʻtkazish va xotirjam hissiy fon uchun javob beradigan mineral hisoblanadi.

Tuz isteʼmolini kamaytirishning eng yaxshi usuli uni boshqa ziravorlar bilan almashtirishdir. Ovqatga xushboʻy ziravorlar qoʻshish orqali taʼm hissingizni boyitish mumkin. Shunda inson asta-sekin bunga koʻnikadi va shoʻr mahsulotlarni isteʼmol qilish istagidan xalos boʻladi.