Yevropa davlati eshiklarini ochmoqda: 500 ming muhojir qabul qilinadi

Shu jumladan, Turkiya fuqarolari ham qonuniy migratsiya dasturi doirasida ishtirok etish imkoniga ega boʻladilar.

Avvalroq «koʻchishni cheklaymiz» degan siyosatni qoʻllab-quvvatlagan Rim hukumati endilikda butunlay teskari yoʻnalishda harakat qilmoqda. 

Mutaxassislarning taʼkidlashicha, har uchta korxonadan biri kelgusi yili Yevropa Ittifoqi tashqarisidan xodim jalb etishni rejalashtirgan. Dastur doirasida ishchi topuvchi agentliklar xodimlarga hali oʻz mamlakatlaridayoq italyan tili va kasb malakasi boʻyicha tayyorgarlik kurslarini tashkil etadi.

Rim hukumati 2026–2028 yillarni qamrab oluvchi yangi migratsiya qarorini eʼlon qildi.

Bosh vazir Jorjiya Meloni boshchiligidagi hukumat ilgari 2023–2025 yillar uchun 450 ming kishilik kvota belgilagan edi. Endi esa bu raqam 500 ming nafarga yetkazildi.

Rasmiy qarorga koʻra:

• 2026 yilda – 164 850 kishi,
• 2027 yilda – 165 850 kishi,
• 2028 yilda – 166 850 kishi Italiyaga qonuniy yoʻl bilan kirish imkoniga ega boʻladi.

Dastur doirasida qishloq xoʻjaligi, turizm, oilaviy xizmat, qurilish kabi sohalar ustuvor yoʻnalish sifatida belgilangan. Arizalar esa «click day» deb nomlangan maxsus sanada qabul qilinadi.

Bosh vazirlik bayonotida yangi reja «mamlakat iqtisodiyoti uchun zarur boʻlgan ishchi kuchini Italiyaga jalb etishni» maqsad qilgani taʼkidlangan.

Qarorda mavsumiy va doimiy ishchilar, uy xizmatchilari hamda parvarishchilar uchun alohida kvotalar belgilanadi. Shuningdek, Italiya bilan hamkorlik qilayotgan va noqonuniy migratsiyani toʻxtatishga koʻmaklashayotgan mamlakatlar uchun «imtiyozli kvota» tizimi joriy etiladi.