Yangi sanoat zonasi aholi bandligiga xizmat qilmoqda

Oʻzbekistonda tadbirkorlarga sharoit yaratish va aholi bandligini taʼminlash maqsadida texnopark va kichik sanoat zonalari tashkil etilmoqda. Namanganda hozirgi kunda 73 ta sanoat zonasi faoliyat yuritmoqda.

“Gʻijduvon tajribasi” asosida 10 gektar maydonda tashkil etilgan “Taraqqiyot” zonasida 113 ta loyiha joylashtirilgan. Uning infratuzilmasi davlat hisobidan barpo etilgan. Natijada yiliga 500 milliard soʻmlik mahsulot ishlab chiqarish quvvati va 4,8 mingta yangi ish oʻrni yaratildi.

Bu yerda ishsizlarni qayta kasbga oʻqitish imkoniyati ham mavjud boʻlib, aholi iqtisodiy faolligi oshmoqda. Prezident avtomobillarga texnik xizmat koʻrsatish markazlari faoliyati bilan tanishib, servis sohasini rivojlantirish zarurligini taʼkidladi.

Shuningdek, mebel ishlab chiqarish koʻrgazmasi koʻzdan kechirildi. Yoshlarni ish bilan taʼminlash, mahalliy sanoatni rivojlantirish va zamonaviy mehnat sharoitlarini yaratish boʻyicha topshiriqlar berildi.