Oʻzbekiston noyob materiallarni ekologik usullarda oʻzlashtirmoqda – euronews.com

Euronews.com muxbiri Deymon Embling Oʻzbekistonda nodir materiallarni qazib olish va ishlab chiqarish borasidagi ishlari boʻyicha lavha tayyorladi.

“Oʻzbekiston uran, mis va nodir yer elementlari kabi tanqis xomashyo turlarini ishlab chiqish va eksport qilish boʻyicha saʼy-harakatlarini kuchaytirar ekan, bu borada atrof-muhitga kamroq zarar yetkazuvchi usullarni joriy etishga intilmoqda.

Navoiy viloyatida Fransiya, Yaponiya va Oʻzbekiston hamkorligidagi yangi qoʻshma loyiha amalga oshirilmoqda. Unda ochiq kon qazib olish usuliga muqobil boʻlgan — yer ostida eritma orqali qazib olish texnologiyasi qoʻllanilmoqda. Bu usul ekologik jihatdan xavfsiz hisoblanadi. Loyiha Fransiyaning Orano kompaniyasi va Oʻzbekistonning “Navoiyuran” davlat korxonasi tomonidan boshqarilmoqda.

Yashil texnologiyalarda foydalaniladigan noyob materiallarga talab ortib borayotgan bir paytda, Oʻzbekiston xalqaro ilgʻor tajribalarni va Iqtisodiy hamkorlik va taraqqiyot tashkiloti (OECD) standartlariga mos yondashuvlarni joriy etmoqda. Rasmiylar bu choralar Yevropalik hamkorlar bilan aloqalarni mustahkamlab,  resurslarni masʼuliyatli oʻzlashtirishga xorijiy investitsiyalar oqimini kuchaytirishiga umid qilmoqda”.